Бугун Ўзбекистон терма жамоаси аъзоси Одил Аҳмедов 27 ёшни қарши олди

Ўзбекистон терма жамоаси ва «Краснодар» клуби аъзоси Одил Аҳмедов бугун, 25 ноябрь куни ўзининг 27 ёшини нишонламоқда, деб хабар беради «Sports.uz».

Одил Аҳмедов Наманганда туғилиб ўсган. У профессионал футболчилик фаолиятини Тошкентнинг «Пахтакор» жамоасида бошлаган ва «шерлар» сафида икки бор (2009, 2011) миллий чемпионатнинг «энг яхши футболчиси» дея эътироф этилган.

Аҳмедов 2011 йил Махачқалъанинг «Анжи» жамоаси сафига қўшилиб, Россия чемпионатида тўп сура бошлади. Бу ерда хавбек 100 га яқин учрашув ўтказиб, маҳаллий мухлисларнинг севимли футболчиларидан бирига айланди. Шу йилнинг июнь ойидан ҳозирга қадар Одил Аҳмедов «Краснодар» жамоасида фаолият олиб бормоқда.

Эслатиб ўтамиз, аввалроқ Осиё Футбол Конфедерацияси расмий сайти Ўзбекистон терма жамоаси сафида 69 учрашув ўтказиб, 11 голга муаллифлик қилган Одил Аҳмедовни ёшига нисбатан тажрибали эканлигини қайд этгани ҳақида хабар берилган эди.