Украинада намойиш этилаётган Россия сериалидаги Путиннинг суратлари хиралаштириб қўйилмоқда
«Украина» телеканали Россия сериалларини намойиш этиш чоғида кадрда Россия Федерацияси президенти Владимир Путиннинг сурати чиқиб қолса, уни хиралаштириб қўя бошлади. Бу ҳақда «Корреспондент.net» хабар бермоқда.
Хусусан, Россия полицияси фаолияти ҳақида ҳикоя қилувчи «Пятницкий» сериали намойиш этилаётганида, Россия етакчисининг портрети хиралаштириб қўйилмоқда.
Телевидение ва радиоэшиттириш масалалари бўйича Миллий кенгаш раҳбарининг биринчи ўринбосари Ольга Герасимьюк идора томонидан Украина телеканалларига Путин суратини ноаниқ қилиб қўйиш бўйича ҳеч қандай буйруқ ва тавсия берилмаганини маълум қилди. Унинг айтишича, бу телеканалнинг ўзигина чиқарган қарордир.
Шу билан бир вақтда, Россия президенти портретининг хиралаштириб қўйилаётгани «Украина» телеканали матбуот хизмати томонидан тасдиқланди. Бироқ улар бу қарорга изоҳ беришдан бош тортди.
