Оғир атлетика бўйича Афро-Осиё чемпионатида Шодилбек Эргашев олтин медални қўлга киритди
Тошкентда оғир атлетика бўйича давом этаётган I Афро-Осиё чемпионати ва III Осиё кубогининг навбатдаги куни ҳам спортчиларимиз учун омадли келди, деб хабар бермоқда Ўзбекистон Миллий ахборот агентлиги.
Чемпионатнинг вазни 94 килограммгача бўлган полвонлар баҳсида иштирок этган ҳамюртимиз Шодилбек Эргашев даст кўтаришда 148 килограмм натижа кўрсатиб, мусобақанинг олтин медалига сазовор бўлди. У силтаб кўтаришда 176 килограмм, иккикураш якунига кўра 324 килограмм натижа билан иккита кумуш медалга ҳам эга бўлди.
Осиё кубогида спортчимиз Муҳаммад Бегалиев 85 килограмм вазн тоифасида муносиб иштирок этди. У даст кўтаришда 155 килограмм штангани ўзига бўйсиндириб, кумуш медални қўлга киритди. Силтаб кўтаришда 182 килограмм натижа билан бронза медаль соҳиби бўлди. Иккикураш якунига кўра 337 килограмм натижани қайд этган полвонимиз иккинчи ўринни эгаллади.
