Ўзбекистонлик икки атлет Тошкентда ўтказилаётган Афро-Осиё чемпионатининг 6 та кумуш медалига сазовор бўлди
Тошкент шаҳрида ўтказилаётган оғир атлетика бўйича I Афро-Осиё чемпионатининг дастлабки кунида Ўзбекистон спортчиларидан Манзурахон Мамасолиева ва Марина Сисоева олтита кумуш медални қўлга киритди. Бу ҳақда Ўзбекистон Миллий ахборот агентлиги хабар бермоқда.
58 килограммгача бўлган хотин-қизлар баҳсида иштирок этган Марина Сисоева даст кўтаришда 87 килограмм, силтаб кўтаришда эса 117 килограмм натижани қайд этди. Иккикураш якунига кўра, 204 килограммлик маррани эгаллаган ўзбекистонлик атлет якунда учта кумуш медаль соҳибига айланди.
Манзурахон Мамасолиева эса 69 килограмм вазн тоифасида даст кўтариш баҳсларида 95 килограмм, силтаб кўтаришда 125 килограмм, иккикураш якунига кўра, 220 килограмм натижа билан мусобақанинг иккинчи поғонасидан жой олди.
Халқаро турнир давом этмоқда.
