Россия Федерацияси таркибидаги Татаристон Республикасининг Қозон шаҳрида бўлиб ўтадиган Turkvision − 2014 халқаро қўшиқ танловида Ўзбекистон шарафини Азиза Низомова ҳимоя қилади, деб хабар бермоқда «Popcorn.uz».
Овоз имкониятлари жиҳатидан ҳақиқий истеъдод соҳибаси Азиза Низомова кўпчиликка айни вақтдаги «Сетора» гуруҳи ижоди орқали яхши таниш. Ёш бўлишига қарамасдан, Азиза яқинда катта масъулиятни ўз бўйнига олди, дейилади хабарда.
Азиза Низомова «Сетора» гуруҳидаги фаолиятидан ташқари, кўплаб эстрада юлдузларининг қўшиқларидаги бек-вокалда айнан унинг овози қўлланилади. Жонли ижрода ҳам маҳорат билан куйлайдиган Азиза айни пайтда Россия Федерациясининг Қозон шаҳрида. Бунга сабаб эса ижодий танлов. Turkvision − 2014 танловида 24 та мамлакатдан вакиллар ғолиблик учун курашишади. 19 ноябрь куни танловнинг ярим финал баҳси ўтказилади. Дунёнинг 39 та давлатида танлов намойиш этилади.
Танловда 5-рақамда сараланган Азиза билан «Popcorn.uz» ходимлари боғланганда, танловда «Дунё бўлсин омон» деб номланган тарона билан иштирок этишини маълум қилган. Танловда қўшиқлар фақат жонли ижрода куйланишини алоҳида таъкидлаш зарур. Бу таронанинг матн ва мусиқа муаллифи шахсан Азиза Низомованинг ўзи. Бу эса унинг иқтидорининг серқирра эканлигидан дарак беради.
Эслатиб ўтамиз, Туркиянинг Эскишеҳир шаҳрида бўлиб ўтган Turkvision − 2013 танловида Ўзбекистон номидан Нилуфар Усмонова иштирок этиб, финалга чиққан ва якунда 11-ўринни эгаллагани хабар берилган эди.
Изоҳ (0)