Ўзбекистонлик шахматчи Сарвиноз Қурбонбоева халқаро турнирнинг 3-турида дуранг натижа қайд этди

БААнинг Шаржа шаҳрида «Мусулмон давлатлари» ўртасида шахмат бўйича халқаро турнир давом этмоқда. Ушбу мусобақада Ўзбекистон терма жамоасининг икки аъзоси ҳам ўз имкониятини синовдан ўтказмоқда, деб хабар берди «Olamsport».

Аёл шахматчилар ўртасидаги баҳсларда Сарвиноз Қурбонбоева, эркаклар мусобақасида Алексей Барсов Ўзбекистон шарафини ҳимоя қилмоқда. Аёллар гуруҳида 18 та давлатдан 26 нафар иштирокчи ўзаро дона сурмоқда. Эркаклар гуруҳида эса 46 нафар қатнашчи ғолиблик йўлида баҳслашмоқда.

Ушбу турнир тўққиз турдан иборат бўлиб, бугунгача учта партия ўйналди. Турнир ғолиби эркаклар ўртасида беш, аёлларда эса уч минг АҚШ долларига эга бўлади. Кеча 3-турда Қурбонбоева қора доналарда қозоғистонлик гроссмейстер Динара Садуакассова билан дуранг ўйнади. Бундан аввалги икки турда Сарвиноз рақибаларини мағлуб этган эди. Барсов эса қора доналарда Элтаж Сафарлига имкониятни бой бериб қўйди.