Ўзбекистонда ўтган ҳафтада содир бўлган ёнғинлар натижасида 5 киши ҳалок бўлди

Ўтган ҳафта мобайнида Ўзбекистон Республикамиз ҳудудида 247 та ёнғин содир бўлди, дея хабар бермоқда Ички ишлар вазирлиги матбуот хизмати.

Турли сабабларга кўра содир бўлган ёнғинларда 9 нафар фуқаролар тан жароҳатлари олган ва 5 нафар фуқаролар ҳалок бўлган. Ушбу ёнғинларда 1 миллиард 204 миллион 113 минг сўм миқдорида қурилиш материаллари ва 932 миллион 181 минг сўм миқдорида моддий бойликлар ёнғиндан сақлаб қолинган.

Фарғона вилояти Қўқон шаҳрида жойлашган уйларнинг бирида иситиш печидан сизиб чиққан газ ҳидини сезмаган уй эгаси Ж. Ҳолиқова, хонага кириб электр чироғини ёққан вақтида хонага тўпланган газ ва ҳаво аралашмасининг чақнаши содир бўлиб, ёнғинга олиб келган. Ёнғин натижасида уйнинг 70 метр² майдонда томи ва шифт қисми ёниб зарарланган. Чақнаш натижасида Ж. Ҳолиқова ва унинг 6 ёшли ўғли куйиш тан жароҳати олган ҳолда шифохонага ётқизилган.

Самарқанд вилояти Пастдарғом туманида яшовчи О. Рустамовнинг уйида ёнғин содир бўлиб, уйнинг 80 метр² майдонда том қисми ёнган. Ёнғин электр симларининг қисқа туташуви натижасида содир бўлган.

Андижон вилояти Марҳамат туманида жойлашган уйларнинг бирида газ чақнаши натижасида ёнғин содир бўлди. Яшаш хонасига ўрнатилган иситиш печидан сизиб чиққан газ ҳидини сезмаган уй эгаси Г. Омонова, хонага кириб электр чироғини ёққан вақтида хонага тўпланган газ ва ҳаво аралашмасининг чақнаши содир бўлиб, ёнғинга олиб келган. Ёнғин натижасида уйнинг 30 метр² майдонда томи ва шифт қисми ёниб зарарланган. Чақнаш натижасида Г. Омонова куйиш тан жароҳати олган ҳолда шифохонага ётқизилган.