28 октябрь — 1 ноябрь кунлари дунёдаги етакчи телеканаллардан бири бўлган Euronews эфирида Uzbekistan Life туркум дастурлари доирасида «Самарқанднинг бебаҳо меросини асраб» номли телекўрсатув намойиш этилди. Мазкур кўрсатув 2—3 ноябрь кунлари ҳам мухлислар эътиборига ҳавола этилади, деб хабар бермоқда «Жаҳон» ахборот агентлиги.
Телекўрсатувда Самарқанд шаҳрининг бой маданий ва тарихий мероси бўлган машҳур Регистон майдонини асраш борасида олиб борилаётган кенг қамровли ишлар ҳақида ҳикоя қилинади.
Шунингдек, Амир Темур ва Мирзо Улуғбек даврларида ўзига хос «Кремний водийси»га айланган Самарқанд ўз даврининг ажойиб олимлари ва моҳир ижодкорларини тўплагани таъкидланади.
Бундан ташқари, Самарқанд атрофидаги Имом ал-Бухорийга бағишланган хотира мажмуасига алоҳида эътибор қаратилган.
Кўрсатувда ҳар йили шаҳарнинг тарихий ёдгорликларида 90 га яқин малакали реставратор иш олиб бориши қайд этилди.
«Самарқанднинг бебаҳо меросини асраб» кўрсатувини Euronews телеканали орқали 2 ноябрь куни Тошкент вақти билан 03:19, 11:19, 19:21 ва 21:15 да, 3 ноябрь куни эса 16:20, 19:51 да томоша қилиш мумкин.
Эслатиб ўтамиз, Euronews телеканали Самарқанд шаҳрида ўтказилган БМТ Жаҳон туризм ташкилоти (UNWTO) Ижроия қўмитасининг 99-сессияси ҳақида тайёрланган махсус репортажни мухлислар эътиборига октябрь ойи бошида ҳавола этди. Мазкур телекўрсатув бир неча миллион кишилик аудиторияга намойиш этилди.
«Жаҳон» ахборот агентлигининг маълум қилишича, яқин кунларда Euronews мухлислари Ўзбекистоннинг яна икки қадимий шаҳри — Бухоро ва Хива ҳақида тайёрланган кўрсатувларни ҳам томоша қилиш имконига эга бўлади.
Изоҳ (0)