2014 йилнинг 26—30 октябрь кунлари Тошкент шаҳрида Халқаро гимнастика федерациясининг 80-Конгресси ўтказилади, деб хабар бермоқда Ўзбекистон Миллий Олимпия қўмитаси.
Мазкур Конгрессда Халқаро гимнастика федерацияси президенти Бруно Гранди, Осиё гимнастика иттифоқи раҳбари Раҳмон ал-Шатри бошчилигида дунёнинг 80 давлатидан келган 240 нафардан ортиқ меҳмон иштирок этади.
Пойтахтдаги International Hotel Tashkent меҳмонхонасида ўтказиладиган Халқаро гимнастика федерациясининг Бош Ассамблеяси 29—30 октябрь кунлари ўтказилади. Унга қадар эса 26—28 октябрь кунлари ташкилий қўмита аъзоларининг йиғилиши бўлиб ўтади.
Ассамблея йиғилиши кун тартибидан жаҳонда гимнастика спортини янада ривожлантириш, Халқаро гимнастика федерациясининг янги таҳрирдаги Низомини тасдиқлаш, ташкилотнинг 2014 йил бўйича молиявий ҳисоботи ҳамда 2015—2016 йиллар учун сметаси тасдиқланади. Бундан ташқари, йиғилишда Халқаро гимнастика федерацияси ва техник қўмита аъзоларининг сайлови ўтказилади ҳамда навбатдаги Конгрессни қаерда ўтказилиши аниқланади.
Маълумот учун, Халқаро гимнастика федерациясининг Конгресси ҳар икки йилда бир маротаба ўтказилади. Халқаро гимнастика федерациясининг 80-Конгрессини Тошкент шаҳрида ўтказилиши 2012 йил Мексиканинг Канкун шаҳрида бўлиб ўтган Конгрессда эълон қилинган.