Қишлоқда, айниқса, тайёр қишлоқ хўжалиги маҳсулотларини қайта ишлаш ва ишлаб чиқаришга ихтисослашган тадбиркорлик субъектларининг ривожлантирилиши ва кенгайтирилиши кейинги йилда 127,5 мингдан зиёд кишини иш билан банд қилиш имконини беради. Бу ҳақда Ўзбекистон Миллий ахборот агентлиги хабар бермоқда.

Шунингдек, Олий Мажлис Қонунчилик палатаси мажлисида бўш турган ва захираланган иш ўринлари ҳисобига касб-ҳунар коллежларининг 487,7 мингдан зиёд битирувчисини ишга жойлаштириш 2015 йилда иш ўринларини ташкил этиш дастурининг муҳим йўналиши эканлиги қайд этилди.

Ишсизларнинг, шу жумладан, меҳнат мигрантларининг бандлигини таъминлаш, шунингдек, меҳнат тўғрисидаги қонун ҳужжатларига, мустақил тарзда ишга жойлашиш учун иш жойини танлашга доир бепул маслаҳатлар бериш ҳам назарда тутилмоқда.

Депутатлар иш ўринларини ташкил этишда ишлаб чиқаришни модернизация қилиш, амалдаги корхоналарни технологик жиҳатдан янгилашда юқори технологияларни жорий этиш масалаларига эътибор қаратиш, ишлаб чиқариш корхоналарида ҳам, хизматлар соҳасида ҳам инновацион технологиялардан кенгроқ фойдаланиш муҳимлигини таъкидлади.

Шунингдек, Ўзбекистонда кўплаб турдаги экологик тоза маҳсулот ишлаб чиқаришга ихтисослашган йирик корхоналарни ҳам, хусусий сектордаги корхоналарни ҳам ривожлантириш ҳисобига иш ўринларини ташкил этиш назарда тутилганлиги муҳим экани таъкидланди.

Ўзбекистон Республикаси Олий Мажлиси Қонунчилик палатаси муҳокама чоғида билдирилган фикр-мулоҳазаларни инобатга олган ҳолда 2015 йилда иш ўринлари ташкил этиш ва аҳоли бандлигини таъминлаш дастурини тасдиқлади ҳамда тегишли қарор қабул қилди.