Facebook’даги «Водители Ташкента» («Тошкент ҳайдовчилари») гуруҳи аъзоларидан бири Сирғали автомобиль бозорида сотувга қўйилган, целлофанга ўралган Lacetti машинаси расми билан бўлишди.
Ушбу пост тез орада оммалашиб, бир суткадан кам вақт давомида 150 дан зиёд лайк йиғди. Шу вақт ичида унга 65 марта фикр билдирилди.
Изоҳларнинг кўпчилигида сотувчининг «ўта эҳтиёткорлиги» кулгу остига олинган. «Машина атрофига тўсиқ қўйиб, ‘Қўл билан тегилмасин’ деб ёзиб ҳам қўйишмабди-да», — дея қайд этилган улардан бирида.
«Маҳсулотни ўраш бўйича заводни ҳам ортда қолдирибди», — дея кинояомуз мақтаган фойдаланувчилардан яна бири.
Шунингдек, машина эгасига уни яна кўрпачалар билан ўраб қўйиш, пенопласт билан қоплаб, қутига жойлаш каби ҳазиломуз маслаҳатлар берилган.
Фойдаланувчилар орасида саноқли кишиларгина сотувчи тарафини олиб, целлофаннинг ёмғирдан ҳимоя сифатида кийгизилганини тахмин қилган.
Изоҳ (0)