Саудия Арабистони Таълим вазирлиги машҳур муаллимларни BMW автомобили ва 10 мингдан 120 минггача саудия риали (2,5 мингдан 32 минг АҚШ долларгача) билан тақдирлашга қарор қилди, деб хабар бермоқда Arab News.
Мукофотларга энг яхши муаллимлар ва мактаб директорлари даъво қилиши мумкин. Аълочи ўқувчиларни ҳам алоҳида эътироф этиш таклиф қилинмоқда, аммо уларни қай усулда тақдирлаш масаласига ҳали аниқлик киритилмади.
Маълум қилинишича, таълим вазирлиги 2014 йил совриндорларини аллақачон танлаб бўлган. Вазирлик вакилларининг таъкидлашича, BMW автомобиллари билан тақдирлаш жуда яхши мотивация бўлиши керак.
Саудия Арабистони бюджетининг тўртдан бир қисмидан кўпроғи таълим соҳасига сарфланади. Қиролликда 8 та университет, 24 мингдан ортиқ мактаб, кўплаб колледж ва бошқа таълим муассасалари фаолият юритади.
Қироллик фуқаролари бепул таълим олади. Бундан ташқари, ҳукумат талабалар таълим олиши учун барча шарт-шароитларни яратиб беради, ҳамда уларни адабиёт билан таъминлайди.