Қатар терма жамоаси олдида турган учта ўртоқлик ўйинида 22 ёшгача бўлган футболчилар билан иштирок этишга қарор қилди. Қатарликлар бугун Ўзбекистон, 9 октябрь куни Ливан, 14 октябрь куни эса Австралия билан ўртоқлик учрашувларини ўтказади, деб хабар бермоқда Stadion.uz.
Қатар У-22 терма жамоаси билан мазкур ўйинларда иштирок этиш орқали Форс кўрфази кубогига тайёргарлик кўришни мақсад қилган. Ушбу ўйинлар ёрдамида жамоанинг жазоирлик бош мураббийи Жамол Белмадий Саудия Арабистонида бўлиб ўтадиган Кўрфаз кубогига борадиган таркибни аниқлаб олади. Ҳозирда терма жамоа сафида 25 нафар футболчи шуғулланмоқда. Улардан 23 нафари мусобақага йўл олади.
Қатар ва Ўзбекистон терма жамоалари ўртасидаги ўйин Доҳадаги «Аш-Шорта» клубига қарашли Абдулла бин Халфа стадионида бўлиб ўтади. Баҳс Тошкент вақти билан 21:30 да бошланади.