Шимолий Атлантика альянсига кирувчи Шарқий Европа мамлакатлари Россиядан хавфсирамаслиги керак. Негаки, НАТО уларнинг хавфсизлигига кафолат беради. Бу ҳақда альянснинг янги бош котиби Йенс Столтенбергнинг 4 октябрь куни Financial Times газетасида эълон қилинган интервьюсига таяниб, Korrespondent.net хабар бермоқда.

«Биз аҳолиси беш миллионга тенг бўлган кичик мамлакат эдик. Бироқ совуқ уруш вақтида ўзимизни доим хавфсизликда ҳис қилганмиз. Чунки бизда доимий базалари йўқлиги ёки ҳарбийлар жойлаштирилмаганига қарамай, НАТО бизга ёрдамга келишига ишонганмиз. Мен Россия билан чегарадош кичкина мамлакат бўлиш қандай эканлигини тушунаман», — деди Норвегиянинг собиқ Бош вазири Столтенберг.

Бош котиб НАТО аъзоларининг барчаси, айниқса, Россия билан чегарадош бўлган шарқий ҳамкор давлатларнинг эҳтиёжини тушунишини таъкидлади. Столтенберг Норвегиянинг ўзини дадил ҳис қилгани ва ҳозир ҳам ҳис қилиши каби қолган барча ҳамкорларда ҳам шундай ишончни уйғотиш ўзининг вазифаси эканлигини қайд этди.

Бош котиб альянснинг Шарқий Европадаги ҳарбий иштирокини чекловчи энг муҳим Россия — НАТО ҳужжати денонсация (бекор) қилинишига қаршилигини билдирди.

«Биз халқаро шартномаларни бузмаган ҳолда шарқий ҳамкорларимиз ҳудудидаги ҳарбий иштирокимизни кенгайтириш йўлини топдик», — деди Столтенберг.

Интервью берар экан, НАТО Бош котиби Украинанинг альянс аъзосига айланиши борасида ўз фикрини билдиришдан бош тортиб, Украина НАТОга кириш учун, энг аввало, расман ариза бериши кераклигини айтди.

Йенс Столтенберг, шунингдек, Украина шарқидаги қуролли можарони тартибга солиш истиқболларини баҳолашдан ҳам ўзини тийди.