Ўзбекистон инглиз тили ўқитувчилари уюшмаси (UzTEA)нинг «Ёш етакчиларни қўллаб-қувватлаш лойиҳаси» (YLDP) ахборот-ресурс марказида «Сардорлар суҳбати» ўқув клубининг очилиш маросими бўлиб ўтди.
Жаҳон иқтисодиёти ва дипломатия университетида жойлашган UzTEA кутубхонасининг анжуманлар залида бўлиб ўтган тадбирда UzTEA раиси Феруза Рашидова, Республика чет тили ўқитиш маркази директори Мираббос Ирисқулов, АҚШнинг Ўзбекистондаги элчиси ўринбосари Лаура Тревис ҳамда уюшма фидойилари, ҳамкор ташкилот вакиллари, фаол ёшлар иштирок этди.
«Маросимни ўтказишдан мақсадимиз фаол ёшларнинг ижодий салоҳиятини юзага чиқариш, уларнинг ғоя ва мақсадларини қўллаб-қувватлаш, уларни эркин фикрлашга, мулоҳаза қилишга, етакчига хос бўлган хусусуятларини яна ҳам кучлироқ шакллантиришга ўргатишдир.
Бундан ташқари, биз бугун янги бир ‘Сардорлар суҳбати’ номли клуб тақдимотини ҳам ўтказдик. Ушбу клубимиз ҳам бизда илгаридан мавжуд бўлган ‘Муаммолар ечими’, ‘Мусиқий клуб’, ‘Киноклуб’, ‘Китобхон клуби’ ҳамда ‘Математика клуби’ сингари фақат ва фақат инглиз тилида олиб борилади ва ёшларнинг юқорида санаб ўтилган хусусиятларини ривожлантиришга хизмат қилади», — деди YLDP координатори Замира Акрамова.
Тадбир доирасида АҚШ элчихонаси YLDP лойиҳаси учун ажратган ўқув адабиётлари ва бадиий асарлар жамланмаси кўринишидаги хайрия грантини тақдим этди. Шунингдек, YLDPнинг ёш нотиқлари томонидан Ўзбекистон ва жаҳон сардорлари ҳаёти ва фаолиятига бағишланган интерфаол тақдимот ҳам ташкил этилиб, унда Миржалол Мирсабитов, Нажиба Ҳазратқулова, Билол Йўлдошев ҳамда Саидазиз Аъзамов ўз нутқ ва тақдимотлари билан иштирок этди.
«Биз тадбир доирасида ўтказган интерфаол тақдимотимиз орқали ёшларни янги ташаббуслар қилишга, ўзларининг етакчилик қобилиятларини намойиш этишга, ғоялари билан жамиятга манфаат келтиришга ундадик, деб ўйлайман. Бугун очилган янги клубимизда биз ўз тенгдошларимизни YLDP ғоялари билан таништириш, улардаги чет тилида сўзлашиш қобилиятини ривожлантириш, жамият ҳаётида фаол бўлишга интилиш ҳосил қилишга ҳаракат қиламиз. Бугун биз ҳам ўз тақдимотимизда дунё ва юртимизда улкан маънавий ишларни амалга оширган шахслардан айримларининг ҳаёт йўлини ёшларга таништириш билан уларда ўша шахсларга нисбатан ҳурмат, уларнинг мавқейига интилиш, уларга ҳавас қилган ҳолда яна ҳам кучлироқ билим олишга интилиш каби мақсадларни пайдо қилишга ҳаракат қилдик ва бунга қайсидир жиҳатдан эриша олдик, деб ўйлаймиз», — деди YLDP ёш етакчиси Билол Йўлдошев.
Тадбир сўнггида ташкилотчилар қатнашчилар учун ақлий машғулотлар, викториналар уюштириб, ғолибларга эсдалик совғалари тақдим этди.
Изоҳ (0)