Аввал хабар берганимиздек, 2014 йилнинг 25—27 сентябрь кунлари ташқи ишлар Вазири Абдулазиз Комилов бошчилигидаги Ўзбекистон Республикаси делегацияси БМТ Бош Ассамблеяси 69-сессиясидаги умумий мунозараларда иштирок этди.
Унда Ўзбекистон ТИВ раҳбари БМТ Бош Ассамблеяси кун тартибидаги баъзи муҳим масалалар бўйича гапириб ўтди.
У жумладан 2030 йилгача Ўзбекистонда ялпи ички маҳсулотнинг киши бошига 9,3 минг долларгача ошиши кўзда тутилганини айтди.
«Ўзбекистон Афғонистоннинг ички ишларига аралашмаслик сиёсатини олиб бормоқда, у билан ҳар иккала мамлакат миллий манфаатларини кўзлаган ҳолда, икки томолама асосда барқарор ва дўстона муносабатлар ўрнатади ва уларни ривожлантиради. Ўзбекистон афғон халқи сайлайдиган ҳукуматни қўллаб-қувватлайди», — деди Комилов.
У минтақадаги баъзи давлатларнинг беғараз ва профессионал бўлган халқаро экспертизаларни ўтказмасдан туриб, улкан ғовли йирик ГЭСлар қуриш лойиҳаларини илгари суриши номақбул эканлигини таъкидлади.
«Оқибатларни синчковлик билан таҳлил қилмасдан туриб бундай лойиҳаларнинг амалга оширилиши трансчегаравий дарёларнинг табиий оқиб тушишини издан чиқаради ҳамда Марказий Осиёдаги сув, озиқ-овқат ва экологик хавфсизликни хатарга қўяди, бу эса минтақада танглик ва низо потенциали ўсишига олиб келиши мумкин. 9 ва ундан юқори магнитудали зилзилалар эҳтимоли бўлган, баланд тоғлардаги юқори сейсмик зоналарга бундай улкан гидротехника иншоотларини қуриш вайронкор техноген офат хавфини келтириб чиқаради», — деди Абдулазиз Комилов.