26 сентябрь куни Алишер Навоий номидаги кино саройида «Ўзбеккино» Миллий агентлиги буюртмасига асосан «Ватан» киностудиясида тасвирга олинган «Гумроҳлар» бадиий фильмининг оммавий ахборот воситалари вакиллари учун премьераолди намойиши ҳамда фильм ижодкорлари иштирокида матбуот анжумани бўлиб ўтди. Бу ҳақда «Туркистон-пресс» нодавлат ахборот агентлиги хабар бермоқда.

Мазкур фильм ёшларнинг мафкуравий иммунитетини ошириш ҳамда турли ғоявий таҳдидлардан огоҳ бўлишга чақириш мақсадида яратилган бўлиб, фильмни тасвирга олиш жараёнлари Андижон вилоятида, Туркия ҳамда Америка Қўшма Штатларида амалга оширилган.

Фильмнинг сценарий муаллифи ва постановкачи режиссёр Ҳилол Насимов, постановкачи оператор Беҳзод Қодиров, постановкачи рассом Алишер Умрзоқов, бастакор Хуршида Ҳасанова, овоз оператори Абдуқаҳҳор Каримовдир. Фильмда асосий ролларни Мирза Азизов, Самандар Ҳамроқулов, Эркин Комилов, Хайрулла Саъдиев, Бахтиёр Қосимов, Жамила Ғофурова, Сайёра Юнусова, Шаҳло Темирова ижро этган.

«Гумроҳлар» фильми ўзбек халқининг осуда ҳаёти ва тараққиётига путур етказмоқчи бўлган қабиҳ кимсаларнинг кирдикорларини фош қилиш мақсадида тасвирга олинган бўлиб, фильм сюжети ҳуқуқни муҳофаза қилиш органлари тўплаган ҳужжатлар асосида яратилган.

Фильм шаҳар кинотеатрларида октябрь ойининг бошларида кенг томошабинлар оммаси эътиборига ҳавола этилади.