Бирлашган Миллатлар Ташкилоти Бош Ассамблеяси йиғилиши учун Нью-Йоркка ташриф буюрган АҚШ президенти Барак Обама ОАВ ва ижтимоий тармоқларда «расмий этикетни билмагани учун» танқидга учради. Бу ҳақда «Сегодня» нашри хабар бермоқда.

Нью-Йоркка келган давлат раҳбарини қаршилаш учун чиққан денгиз пиёда аскарларига честь бераётганда Обаманинг бир қўлида ичимлик қуйилган стакан бўлган. ОАВнинг баъзи маълумотларига қараганда, бу ичимлик қаҳва бўлган.

Ушбу ҳолат бир зумда интернет-мемга айланди. Twitter фойдаланувчилари бу воқеага атаб #LatteSalute хештегини ўйлаб топишди.

Буюк Британиянинг Daily Mail нашри ёзишича, «стакан билан берилган» честь Обаманинг фахрийлар ва ҳарбийлар олдидаги ҳурмати тушишига сабаб бўлиши мумкин. Шунингдек, бу ҳолатни ҳарбий низомни бузиш сифатида ҳам талқин қилиш мумкин. Washington Times мухбирлари эса президент оддий этикет қоидаларини тез-тез эслаб туриши фойдадан ҳоли бўлмаслигини таъкидлаган.

Америкалик интернет-фойдаланувчилар «қаҳвали саломлашув»ни ҳазил билан қабул қилган. Оқ уй аккаунтидаги видеога изоҳ қолдирганларнинг кўпчилиги эса танқидчиларга бир оддий ҳолатдан можаро чиқариш ўрнига муҳимроқ сиёсий ва иқтисодий муаммоларга эътибор қаратишни маслаҳат берган.