«Туркистон» саройида Infocom — 2014 ахборот-коммуникация технологиялари ҳафталиги доирасида MIT.uz — миллий интернет танлови ғолибларини тақдирлаш маросими бўлиб ўтди. Бу ҳақда «Камолот» ёшлар ижтимоий ҳаракатининг ахборот хизмати хабар бермоқда.

Мазкур танлов Ўзбекистон Республикаси Президентининг 2014 йил 6 февралдаги ПҚ-2124 сонли Қарори билан тасдиқланган «Ўзбекистон Республикасида 2014 йилда ёшларга оид давлат сиёсатини амалга оширишга қаратилган қўшимча чора-тадбирлар Дастури»га мувофиқ ташкил этилди.

Тантанали тақдирлаш маросими расмий бошланишидан аввал «Туркистон» саройининг фоесида танлов иштирокчилари тақдим этган ишлар фотокўргазмаси ташкил этилди.

Бундан ташқари, Тошкент ахборот технологиялари университети талабалари томонидан тайёрланган техник ишланмалар, дастурлар намойиши ўтказилди.

Бу кўргазмалар маросимга ташриф буюрган меҳмонларда катта қизиқиш уйғотди.

Аста-секинлик билан тадбирнинг асосий қисми яъни танлов ғолибларини тақдирлаш маросими бошланди.

Томошабинлар орасидан доира садоси билан кириб келган ёш доирачилар тадбирни очиб берди.

Доира садоси аста-аста тўхтаб, зал бўйлаб қоронғулик ҳукм сурди. Қоронғулик бағридан қизил, кўк ранглар жилоси замонавий рақс ҳаракатлари билан нур бағишлади.

Ана шу тариқа MIT.uz — миллий интернет танловининг тантанали маросими старт олди ва ғолиблар тақдирланди.