КХДР давлат мудофаа қўмитаси АҚШ давлат котиби Жон Керрига танқид тошлари отди ва уни «қўй терисига бурканган бўри» деб атади. Бу ҳақда Жанубий Кореянинг Yonhap агентлиги хабар берди.
Қўмитанинг сиёсат департаменти Америка дипломатияси раҳбарини ёш болаларга хос хатти-ҳаракатларда айблади. Шимолий Кореяга қарата гоҳ таҳдид қилиш, гоҳ ярашиш таклифини киритиш катталарга хос иш эмаслиги таъкидлади.
Associated Press аниқлик киритишича, яқинда АҚШ ва Жанубий Корея навбатдаги ҳарбий ўқув машқларини бошлаган бўлса-да, давлат котиби Корея ярим оролида тинчлик ўрнатилишини ёқлаб чиққан.
«Керрининг хатти-ҳаракатлари яна бир марта америкача иккиюзламачиликни кўрсатиб берди», — дейилади КХДР давлат қўмитаси вакили баёнотида. Унинг сўзларига кўра, АҚШ «ҳийла-найрангларнинг барча турларидан фойдаланиб, инсониятни алдайди ва устидан кулади».
Шимолий Корея аввал ҳам бундай ҳақоратли баёнотлар билан чиқиш қилган. Апрель ойида АҚШ президенти Сеулга ташриф буюриб, икки давлат Шимолий Кореяни тўртинчи ядро синовини ўтказиш ниятидан қайтиш ҳақида огоҳлантиргач, КХДР Корея Республикаси президентини фоҳиша, Оқ уй раҳбари Барак Обамани эса қўшмачига тенглаштирган эди.
Изоҳ (0)