Ўзбекистоннинг э-спортчилари ФИФА симулятори (компьютер ўйини) бўйича Electronic Sports World Cup (ESWC — 2014) жаҳон кубоги финал босқичида қатнашади. Бу ҳақда InfoCOM.UZ хабар берди.
Ўзбекистонда э-спорт чемпионатларини ўтказишда бир неча йиллик тажрибага эга InfoCOM.Uz ESWC — 2014 ташкилотчилари билан мазкур халқаро турнирда ўзбекистонлик э-спортчилар ҳам иштирок этиши ҳақида шартнома имзолади.
Ўзбекистон ESWC’да илк бор қатнашаётгани учун ҳозирча унга турнирда битта ўрин банд қилинган.
Жаҳон кубоги финалида иштирок этадиган ўзбекистонлик э-спортчининг исми август—сентябрь ойларида бўлиб ўтадиган ESWC — 2014 ФИФА Uzbekistan саралаш турниридан сўнг маълум бўлади. Айни дамда мазкур чемпионатга тайёргарлик ишлари кетмоқда.
Э-футбол бўйича жаҳон кубогининг финал босқичи 2014 йил 29 октябрдан 2 ноябргача Франция пойтахтида Париж ўйинлар ҳафталиги (Paris Games Week) доирасида бўлиб ўтади.
Маълумот учун, ESWC 10 йилдан бери ўтказиб келинмоқда. Турнирда 50 дан зиёд мамлакат қатнашади.