АҚШнинг Россияга киритган янги санкциялари Кремлнинг Украинадаги ҳаракатларини қўллаб-қувватлаган бир неча компанияларга таъсир қилади. Бу ҳақда Euronews хабар берди.

Россия Думаси Спикери ўринбосари Сергей Неверов, Қрим ишлари бўйича вазир Олег Савелев, президент ёрдамчиси Игор Шеголев ва тан олинмаган «Донецк халқ республикаси» раҳбари Александр Бородай сингари мансабдор шахслар, шунингдек, «ВнешЭкономБанк», «Газпромбанк», «Роснефт», «Уралвагонзавод», «Новатек» компаниялари, «Алмаз-Антей» ва «Калашников» концернлари «қора рўйхат»дан жой олди. Санкцияларга қарамай, уларнинг АҚШдаги активи музлатилмади.

АҚШ президенти Обама бу ҳаракатларни Европа билан келишган ҳолда амалга оширганини айтди. «Биз кейинги қадамни келишиб олиш учун Брюсселда учрашамиз. Россия раҳбарияти Украинадаги ҳаракатлари салбий оқибатларга олиб келиши, хусусан, Россия иқтисоди кучсизланиши ва дипломатик изоляция қилинишини англаб етишини кутмоқдамиз», — деди Обама.

Россия президенти Владимир Путин санкциялардан Бразилияда эканлигида хабар топди ва мухбирларга Вашингтон бу билан ўз мақсадларига эриша олмаслигини айтди.

Евроиттифоқ ҳам санкцияларга қўшилди, бироқ у ҳозирча элчиларга «қора рўйхат»ни кенгайтириш ҳақида буйруқ бериб, иттифоқнинг Европа сармоя банки ҳамда Европа тикланиш ва тараққиёт банки сингари тузилмалари Россияда янги лойиҳаларни молиялаштирмаслиги, ЕИ бюджетидан молиялашитирилаётган ва ҳозирда амалда бўлган лойиҳалар эса тўхтатилишини эълон қилди.