14 июль куни Исроилнинг ҳаво мудофаа тизими Ғазо сектори томонидан йўналган биринчи учувчисиз самолётни уриб туширди. Бу ҳақда NBC News хабар берди.
Исроил мудофаа армияси ахборот хизматининг сўзларига кўра, учувчисиз аппарат Тел-Авивдан 30 километр узоқликдаги Ашдод шаҳри яқинида Patriot ракетаси билан уриб туширилган. Ҳозирда ҳарбийлар мосламанинг қолдиқларини қидирмоқда.
Маълум қилинишича, фаластинликлар учувчисиз самолётлардан илк бор фойдаланган. ҲАМАС вакиллари гуруҳнинг ҳарбий қанотида яна бир нечта учувчисиз самолётлар борлиги ва улар Исроил ҳудудида махсус миссия ўтказиши мумкинлигини айтмоқда.
14 июлга ўтар кечаси Исроил қуролли кучлари Ғазо секторига қарата бир неча бор зарба берди. Фаластин соғлиқни сақлаш вазирлиги берган маълумотга кўра, ҳужум натижасида 160 дан ортиқ тинч аҳоли ҳалок бўлган. Бунга жавобан, Ғазо секторидан Исроилга қарата мингдан ортиқ ракета учирилди. Жабрланганлар қайд этилмади.
Эслатиб ўтамиз, отишмалар июль бошида яҳудийлар диний мактабидан ўғирланган уч исроилликнинг ўлдирилганидан буён давом этмоқда.