«Тошшаҳартрансхизмат» акциядорлик компанияси 2015 йилга қадар ўзининг такси хизматини ишга туширади. Бунинг учун компания 140 та енгил автомобиль сотиб олади, дея Anhor.uz хабар берди.

Шунингдек, компания йил сўнгига қадар барча автобусларни GPS-навигаторлар билан таъминлайди. Шу мақсадда Meitrack Group компанияси билан 2500 та GPS-трекер, 150 та GPS-антенна ва 150 та GSM-антенна етказиб бериш ҳақида шартнома имзоланган.

Жамоат транспортининг ҳаракатини яхшилаш мақсадида Тошкент ҳалқа автомобиль йўли бўйлаб автобекатлар қуриш ва реконструкция қилиш, шунингдек, «Пахтакор», «Беруний», «Дўстлик», «Чорсу», «Олмазор» ва «Ҳабиб Абдуллаев» метро бекатлари яқинидаги йўналишларнинг охирги нуқталарини ҳам реконструкция қилиш режалаштирилмоқда.

14 йўналишдаги Mercedes маркали автобуслар Isuzu автобуслари билан алмаштирилади. 22 йўналиш эса бу икки корхона автобусларидан биргаликда фойдаланади. Бундан ташқари, 21 автобус йўналиши метрополитен бекатлари билан боғланади. Зарарга ишлаётган 43 автобус йўналиши эса яхшиланади.

Режада, шунингдек, замонавий ахборот-коммуникация технологияларини киритиш орқали Тоштрансдиспетчерхизмат» ходимлари сонини 228 тага камайтириш ҳам кўзда тутилган.