Samsung компаниясининг янги планшети Galaxy Tab S’нинг дунё бўйлаб сотуви бошланди, шу боис унинг рекламалари ҳам чиқарилди. Янги реклама роликларида асосий рақиб — Apple iPad Air’нинг камчиликлари танқид қилинган. Бу ҳақда Mail.Ru хабар берди.

Биринчи видеороликда икки хил планшетдан фойдаланаётган йигитлар тасвирланган. iPad Air’дан видео кўраётган йигит дисплей рангларидаги камчлик сабаб айрим ҳаракатларни пайқай олмайди. Galaxy Tab S фойдаланувчиси эса Super AMOLED дисплей эвазига видеони камчликларсиз томоша қилади.

Иккинчи видеороликда эса Samsung Galaxy Tab S планшети экранидан бир вақтнинг ўзида бир нечта функциялардан фойдаланиш мумкинлиги тасвирланган. iOS 8 операцион тизимида ҳам бундай хизмат бўлиши кутилмоқда, лекин бу хабар расман тасдқиланмаган. Шунинг учун Samsung ўз планшетининг Apple планшетидан устун эканлигини кўрсатишга ҳақи бор, дейилади хабарда.

Эслатиб ўтамиз, Samsung Galaxy Tab S планшети икки хил – 8,4 ва 10,5 дюймли дисплейга эга бўлади. Шунингдек уларда саккиз ядроли Exynos 5 Octa (1,9 частотага эга тўрт ядроли + 1,4 частотага эга тўрт ядроли) процессори ўрнатилади. Уларнинг тезкор хотираси 3 Гб ва MicroSD ёрдамида ошириш мумкин бўлган доимий хотираси 16 Гигабайтни ташкил этади.

Оқ ва бронза рангида чқарилиши режалаштирилаётган планшетларнинг оғриликлари 465 ва 294 грамм бўлади. Уларда 2,1 мегапикселли олд ва 8 мегапиксельи орқа камералар ўрнатилади. Батареялар қуввати эса 8,4 дюймлиси учун 4900 мА·соат ва 10,5 дюймлиси учун 7900 мА·соатни ташкил этади.