Дунёнинг энг бой кишилари рўйхатидан жой олган уч миллиардер миграция ислоҳотини амалга ошира олмаган АҚШ Конгрессига қарши бирлашди ва бу норозилик борасида New York Times нашрида мақола чоп этди. Бу ҳақда «РИА Новости» хабар берди.

Билл Гейц, Уоррен Баффет ҳамда Шелдон Андельсон мақолада америкалик қонун чиқарувчиларни муросага кела олмаётганликда ва фуқаролар ҳаётини хавф остига қўяётганликда айблаб, «Америка бундан яхшироғига лойиқ», — дея қайд этди.

Миллиардерлар айни дамда юзага келган мушкул вазиятда мамлакат манфаатларидан келиб чиқиб, иш олиб бориш ўрнига мухолифатга қаршилик кўрсатишга кўпроқ куч сарфланаётгани, бу эса америкаликлар ва деярли барча компаниялар раҳбарларининг фаолиятини қийинлаштираётганини таъкидлади. 

Гейц, Баффет ва Андельсоннинг айтишича, кўпчилик америкаликлар муҳожирларни ҳам, фуқароларни ҳам қониқтирадиган миграция қонун лойиҳасини ишлаб чиқиш АҚШ манфаатларига мос деган фикрда, негаки ҳозирда Америка сиёсати бу икки гуруҳ вакилларини ҳимоя қилишда омадсизликка учрамоқда.

Миллиардерлар New York Times’да қайд этганидек, уларнинг сиёсий қарашлари турлича: Гейц ва Баффет Обамани қўллаб-қувватлаган бир вақтда Андельсон унинг 2012 йилда қайта сайланмаслиги учун 100 миллион доллар сарф қилган.

Яна бир америкалик миллиардер — Доналд Трамп ҳам шу мавзуга оид хабарда Мексика чегарасидаги муҳожирлар муаммосини осон ҳал қилиш мумкинлигини ёзган. У Обаманинг бу муаммога бефарқ қараётганини қайд этиб, «Ўз чегарасини ҳимоя қила олмайдиган мамлакат узоққа бормайди», — деб таъкидлаган.