General Motors Uzbekistan автомобиллари Белоруссияда Ўзбекистонга нисбатан арзон нархда сотилмоқда. Нархлар 2014 йил 1—31 июль кунлари бўлиб ўтаётган «Суперцена» («Супер нарх») акцияси доирасида белгиланди, деб хабар берди Anhor.uz Белоруссиянинг TUT.by порталига таяниб.

Автомобиллар савдо-сотиғи Белоруссия рублида амалга оширилади. Ўзбекистонда 21 823 100 — 22 795 720 сўм (9405 — 9825 доллар) билан нархланган Matiz Белоруссияда 6800 долларга, Nexia эса 7800 доллар (Ўзбекистонда 13 493 — 15 410 доллар)га сотилмоқда. Нисбатларда ҳисобланса, Matiz 30—40 фоиз, Nexia эса икки баробар арзон нарх билан сотилаётганини кўриш мумкин.

Белоруссиядаги автомобиллар савдо-сотиғи билан шуғулланувчи UzDaewoo автосалонининг сайтида салон GM Uzbekistan’нинг расмий дилери экани қайд этилган. Бу эса Ўзбекистонда ишлаб чиқарилган автомобилларнинг хорижда икки баробар арзонга сотилишини билдиради, деб ёзади «Анҳор».

Бундан ташқари, Ўзбекистонда автомобиль харид қилиш учун навбатга туриш, нархнинг 85 фоизини олдиндан тўлаш ва маълум вақт кутиш лозим. Баъзан автомобиль ранги учун ҳам қўшимча пул тўланади.

Шу сабабли айрим ўзбекистонликлар ҳайдалган автомобиль сотиб олишни маъқул топади. Мисол учун, 2—3 йил аввал чиққан, фойдаланилган Matiz июнь ойида 23 400 000 — 27 000 000 сўм (10 085 — 11 637 доллар)га нархланди. Бу эса Белоруссиядаги янги Matiz нархидан икки баробар қиммат.

Ўзбекистон ва хориждаги нархларнинг бундай катта даражада фарқланиши, Ўзбекистон фуқаролари учун қимматга сотиш сабаблари General Motors Uzbekistan ёпиқ акционерлик жамиятининг автомобилларига қўйиладиган 29 фоизли акциз солиғи билан боғлиқ.