Sony селфи-сурат олиш учун мўлжалланган Xperia C3 смартфонини тақдим этди

Sony компанияси селфи-суратлар олиш учун мўлжалланган Xperia C3 смартфонини тақдим этди. Бу ҳақда Gizmodo сайти хабар берди.

Sony Xperia C3 смартфонида асосий эътибор автопортрет олишга қаратилгани боис, унинг олд камераси 5 мегапиксель бўлади ва унда махсус сенсорлар ўрнатилади. Олд камера суратга олиш пайтида сиз ва дўстларингизни экранга сиғдира олади.

Шунингдек, смартфонда камера учун мўлжалланган бир қанча дастурлар ҳамда селфи-суратлар рамкалари мавжуд бўлади. Смартфоннинг орқа камераси эса 8 мегапиксельни ташкил этади.

Смартфон 5,5 дюйм ва 1280×720 ўлчамли Triluminous дисплейи, 1,2 ГГерц частотага эга Qualcomm Snapdragon тўрт ядроли процессори, 1 Гб тезкор ва MicroSD ёрдамида 32 гигабайтгача ошириш мумкин бўлган 8 Гб ички хотирага эга бўлади. Унда Android 4.4 KitKat операцион тизими ўрнатилади, аккумуляторининг қуввати эса 2500 мА/соатни ташкил этади.

Xperia C3 смартфони августдан бошлаб чиқарилади. У қора, оқ ва оч кўк рангдаги корпусларда тақдим этилади. Ҳозирча унинг нархи қандай бўлиши ҳақида маълумотлар берилмаган.