Америка штатлари губернаторлари ўз штатларига Барак Обама ташриф буюрганида қоида бўйича уни кутиб олишга чиқади. Бироқ Техас губернатори Рик Перри бундай қилишдан бош тортди, дея хабар берди ИТАР-ТАСС.
Республикачилар партияси тарафдори ва АҚШ маъмурияти иммиграция сиёсатининг азалий танқидчиси бўлган губернатор президентни самолёт зинаси ёнида кутиб олиш ҳақида Оқ уйдан келиб тушган таклифни рад этди.
«Сизни аэропортда кутиб олиш ҳақидаги таклиф учун раҳмат. Аммо қисқагина қўл беришиб кўришиш орқали айни пайтда Техас жанубида содир бўлаётган гуманитар ва миллий хавфсизлик соҳасидаги тангликни муҳокама қилиб бўлмайди», — дейилади Перрининг Обамага аталган мактубида.
Бунинг ўрнига губернатор президентнинг ташрифи давомида алоҳида учрашишни таклиф этди ва бунинг учун ўз кун тартибига ўзгартириш киритишга шайлигини билдирди.
Оқ уйдан келиб тушган жавоб хатида Обама Техасдалигида у билан «жон деб» учрашишини маълум қилди. Губернатор чоршанба куни Далласда бўлиб ўтадиган, АҚШнинг чегара ҳудудларидаги вазиятларга бағишланган давра суҳбатига таклиф этилди.
Изоҳ (0)