Тошкентда «Йилнинг энг фаол ёш ўқитувчиси» танловининг мамлакат босқичи уюштирилди. Унда 14 нафар ёш ўқитувчининг инновацион ғоя, лойиҳа ва технологияларини амалиётга татбиқ этиш, дарс жараёнида ўқувчиларга мавзуга доир тушунчаларни етказиш маҳорати ҳамда илғор педагогик ва ахборот-коммуникация технологияларидан фойдаланиш кўникмаси синовдан ўтказилди, дея хабар беради ЎзА.

Танлов натижаларига кўра, Қашқадарё вилояти Муборак туманидаги Муборак ижтимоий-иқтисодиёт коллежи ўқитувчиси Нодира Умирова биринчи, Бухоро муҳандислик технология институти қошидаги 1-академик лицейи ўқитувчиси Феруза Жумаева иккинчи, Навоий давлат кончилик институти қошидаги 2-академик лицейи ўқитувчиси Ўктам Мардонов учинчи ўринга сазовор бўлди.

Ғолиблар Ўзбекистон Касаба уюшмалари федерацияси кенгаши томонидан Ўзбекистон мустақиллигининг 23 йиллиги олдидан ташкил этиладиган «Ёш мутахассислар» республика форумида иштирок этиш йўлланмасини қўлга киритди. Шунингдек, «Энг зукко ўқитувчи», «Энг маънавий баркамол ўқитувчи», «Энг заковатли ўқитувчи», «Энг педагогик маҳоратли ўқитувчи» каби 11 та номинация бўйича ҳам фаол ёш мутахассислар аниқланди.