КХДР яна бир ракета синовини муваффақиятли ўтказди. Бунда улар Жанубий Корея ракетага қарши мудофааси воситаларига бардош бера олиш имкониятларини текшириб кўрди. Бу ҳақда «ИТАР-ТАСС» хабар берди.
Синовдан ўтган No-Dong баллистик ракетаси 1,3 минг километр масофага уча олади ва Япониянинг бутун ҳудудидаги барча нишонларни йўқ қила олади.
2014 йил мартида ушбу ракетанинг учиш бурчаги ўзгартирилган, натижада унинг парвоз масофаси 650 километргача қисқарган. Экспертлар ҳисоблашича, бу ҳолда No-Dong Жанубий Корея ҳудудидаги нишонларни ура олади. Сеулдаги Patriot ракетага қарши мудофаа қурилмалари эса бурчак ўзгариши натижасида тезлиги ошган No-Dong’ни тутиб ололмайди.
Бундай вазиятларни ҳисобга олган Сеул айни пайтда узоқ масофага учувчи зенит ракеталарини ишлаб чиқмоқда. Улар No-Dong энг юқори тезлик олиб улгурмасидан, уни ўз траекториясининг юқори қисмида ура олади.
Изоҳ (0)