Тошкент, Самарқанд ва Бухорода ўтказилган «Европа кино кунлари» фестивали якунланди

2014 йилнинг 3—8 июнь кунлари Тошкент, Самарқанд ва Бухоро шаҳарларида «Европа кино кунлари» фестивали бўлиб ўтди ва унда Европа Иттифоқига аъзо 11 та мамлакат киноижодкорларининг 13 та бадиий ва анимацион фильми намойиш этилди. Бу ҳақда Ўзбеккино миллий агентлиги сайти хабар берди.

Бухоро шаҳрида 4—8 июнь кунлари ўтказилган фестивалда Европа Иттифоқининг Ўзбекистон Республикасидаги делегацияси раҳбари Юрий Штерк жаноблари иштирок этиб, Бухорода ўтказилаётган фестивал келгусида анъана бўлиб қолишига умид билдирди.

Ўз навбатида Бухоро шаҳар ҳокими Валижон Ўринов бу тадбир Ўзбекистон билан Европа Иттифоқига аъзо мамлакатлар ўртасидаги маданий алоқалар ривожланишига қаратилганини қайд этди.

Фестивал кунлари таниқли финн кинорежиссёри Аки Каурисмякининг «Гавр» деб номланган кинокомедияси билан бошланди. Бундан ташқари, «Бухоро» кинотеатрида Польшанинг «Фақат ҳозир эмас», Чехиянинг «Ўнғай уя», Эстониянинг «Замбуруғ теришга», Франциянинг «Енгилтак болалар» фильмлари намойиш этилди.