Обама Нормандиядаги тантаналар вақтида Путин билан учрашди
АҚШ президенти Барак Обама Нормандияга иттифоқчи қўшинларнинг туширилиши 70 йиллиги билан боғлиқ байрам тантаналари доирасида Россия президенти Владимир Путин билан норасмий учрашув ўтказди. Бу ҳақда АҚШ маъмуриятидаги манбага асосланиб, Reuters ахборот агентлиги хабар бермоқда.
Қайд этишларича, АҚШ ва Россия давлат раҳбарларининг учрашуви 10—15 дақиқа давом этган. Учрашув давомида қандай масалалар муҳокама қилинганига аниқлик киритилмаган, деб ёзади «Кун».
Аввалроқ, Владимир Путин Украинанинг янги сайланган президенти Пётр Порошенко билан қисқача мулоқотда бўлгани ҳақида хабар берилган эди.
Июнь ойи бошида эса Владимир Путиннинг ёрдамчиси Юрий Ушаков Нормандия ташрифи дастуридан АҚШ президенти Барак Обама билан учрашув ўрин олмагани ҳақида ахборот берган эди.
