«Ўзбекистон почтаси» очиқ акциядорлик жамияти томонидан болалар чизган расмлар асосида «Менинг орзуим» махсус почта маркалари тайёрланди ҳамда Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси буйруғи билан 2014 йил 30 майдан муомалага киритилди. Бу ҳақда Infocom.uz хабар берди.
Махсус почта маркалари учун 2014 йил 15 январдан 15 мартгача ўтказилган «Менинг орзуим» мавзусидаги болалар ижодий расмлари республика танлови ғолиблари чизган суратлар танлаб олинди. Танлов «Ўзбекистон почтаси» очиқ акциядорлик жамияти, Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси ҳамда Ўзбекистон бадиий академияси ҳамкорлигида ташкил этилди.
Танловда ҳайъат аъзоларига саккиз ёшдан 12 ёшгача бўлган иштирокчиларнинг ўзлари чизган 1227 та расми тақдим этилди. Саккиз ёшли Сардор Сулеймановнинг «Космонавт» деб номланган сурати биринчи ўринга лойиқ деб топилди. Иккинчи ўринга тўққиз ёшли Камила Ахмадованинг «Қувноқ камалак» расми, учинчи ўринга эса 11 ёшли Валерия Фомичеванинг «Дўстлик» номли сурати муносиб кўрилди.
Болалар расмлари асосида чиқарилган «Менинг орзуим» махсус почта маркалари хат ва бандеролларда дунё бўйлаб тарқалади.
Изоҳ (0)