Гитлернинг ёзув столи Иккинчи жаҳон урушидан кейин биринчи марта оммага намойиш этилди

Нацистлар етакчиси Адольф Гитлерга тегишли ёзув столи Иккинчи жаҳон урушидан кейин биринчи марта оммага намойиш этилди. Айнан шу столда фюрер «тарихдаги энг даҳшатли жиноятлар режасини тузган», деб ёзади The Daily Mail.

Стол 1937 йилда ясалган. Германия ҳукуматининг маълум қилишича, урушдан сўнг у америкаликлар қўлига тушган ва 1957 йилдан 1996 йилгача АҚШ ҳарбий хизматчиларининг Берлиндаги санаториясида «оддий жиҳоз» бўлиб хизмат қилган.

1996 йилда стол Германияга қайтариб берилгач, яна бир неча йил у омборхонада сақланган. 2000 йилдагина ҳукумат қўлига келиб тушган.

Айни пайтда ушбу ёзув столи Берлиндаги омборхоналардан бирида турибди. Германия ҳукумати унинг ҳеч қачон сотилмаслигини таъкидламоқда.