Жиззахда ўрта махсус, касб-ҳунар таълими муассасалари ўқувчилари ўртасида «Шунқорлар» ҳарбий спорт мусобақасининг республика босқичи бўлиб ўтди, деб хабар бермоқда ЎзА.
«Камолот» ёшлар ижтимоий ҳаракати марказий кенгаши, Ўрта махсус, касб-ҳунар таълими маркази, Мудофаага кўмаклашувчи «Ватанпарвар» ташкилоти, «Маҳалла» хайрия жамоат фонди, «Нуроний» жамғармаси ҳамкорлигида ташкил этилган тадбирда вилоят босқичларида ғолиб бўлган жамоалар 14 шарт бўйича баҳслашди.
Қорақалпоғистон Республикаси, вилоятлар ва Тошкент шаҳридаги академик лицей ва касб-ҳунар коллежлари ўқувчиларидан тузилган жамоалар бир неча спорт турлари бўйича жисмоний тайёргарлигини намойиш этиб, ҳарбий соҳага оид билим ва амалий кўникмаларини синовдан ўтказди.
Мусобақалар якунига кўра, Жиззах вилоятидаги Бахмал маиший хизмат кўрсатиш касб-ҳунар коллежининг «Ёш чегарачилар» жамоаси ғолибликни қўлга киритди. Самарқанд вилояти Ургут агротадбиркорлик ва сервис касб-ҳунар коллежининг «Амир Темур ворислари» жамоаси иккинчи, Андижон вилояти Хўжаобод ижтимоий-иқтисодиёт касб-ҳунар коллежининг «Ватанпарвар» жамоаси учинчи ўринни эгаллади.
– Бизнинг коллежда замонавий таълим олиш ва жисмоний чиниқиш учун барча шароит яратилган, – дейди «Ёш чегарачилар» жамоаси сардори Шерзод Ғозибеков. – Ҳарбий ватанпарварлик сабоқларини пухта эгаллашда коллеж ва тумандаги ҳарбий қисмлар ўртасида ўрнатилган яқин ҳамкорлик муҳим аҳамият касб этмоқда. Билим юртида ташкил этилган «Ёш чегарачилар» тўгарагида ўрганганларимиз бугун жуда қўл келди.
Ғолиблар кубок, дипломлар ҳамда фахрий ёрлиқ ва эсдалик совғалари билан тақдирланди.
Изоҳ (0)