«Урганч» халқаро аэропортида янги йўловчи терминали иш бошлади. Бу ҳақда ЎзА хабар берди.
Янги бино «Ўзшаҳарсозлик ЛИТИ» давлат унитар корхонаси томонидан лойиҳалаштирилиб, «93-махсустрест» очиқ акциядорлик жамияти қурувчи ва муҳандислари томонидан жаҳон стандартлари асосида реконструкция қилинди.
– Бино дизайнини ишлаб чиқишда замонавий ва миллий меъморчилик санъати анъаналари ҳисобга олинди, – дейди «93-махсустрест» очиқ акциядорлик жамияти бош директори ўринбосари Ғиёс Абдуллаев. – Янги терминал жаҳон талабларига тўла жавоб беради. Пул айирбошлаш шохобчаси, она-бола хонаси, тиббиёт пункти, Duty-free дўкони, кафетерийлар, кенг, чиройли услубда қурилган 200 йўловчи сиғимига эга транзит ҳамда VIP, CIP заллари ҳам энг замонавий ўриндиқлар ва бошқа зарур воситалар билан таъминланган.
Терминалдаги ахборот хонасидан шаҳарнинг транспорт имкониятлари, меҳмонхоналар, умумий овқатланиш жойлари ҳақида керакли маълумотларни олиш мумкин. Бинода авиация хавфсизлигини юқори даражада таъминлайдиган замонавий текширув ва кузатув ускуналари ўрнатилган.
– 2013 йилда Урганч халқаро аэропорти 143 минг 370 нафар йўловчига хизмат кўрсатган бўлса, шунинг 45 минг 970 нафари чет эллик сайёҳлардир, – дейди «Урганч» халқаро аэропорти директори Ф. Худойназаров. – Янги терминалнинг ишга туширилиши сайёҳларга сифатли транспорт хизмати кўрсатиш борасида қулай шароит ва имкониятлар яратиш йўлидаги муҳим қадамлардан бўлди.
Изоҳ (0)