Тошкентда бадиий гимнастика бўйича жаҳон кубоги босқичи ва Happy Caravan халқаро турнири бошланди. Бу ҳақда ЎзА хабар берди.
Бадиий гимнастика бўйича болалар-ўсмирлар республика ихтисослашган олимпия захиралари спорт мактабида мусобақаларнинг тантанали очилиш маросими бўлди. Маросимда катта концерт намойиш этилди.
Жаҳон кубоги босқичи ва Happy Caravan халқаро турнирида Ўзбекистон, Хитой, Жанубий Корея, Япония, АҚШ, Чехия, Латвия, Жанубий Африка Республикаси, Малайзия, Мексика, Россия, Озарбайжон, Арманистон, Беларусь, Вьетнам, Исроил, Ҳиндистон, Италия, Қозоғистон, Қирғизистон терма жамоалари иштирок этади.
– Ўзбекистонда кўплаб соҳалар сингари спортни, жумладан, болалар ва хотин-қизлар спортини ривожлантиришга қаратилаётган доимий эътибор юксак самаралар бераётир, – дейди Халқаро гимнастика федерацияси вакили Ноҳа Абу Шабана. – Буни Тошкент шаҳрида бадиий гимнастика бўйича нуфузли халқаро мусобақалар мунтазам равишда ўтказилаётгани, Ўзбекистонда барча спорт анжуманларини юксак савияда ташкил этиш бўйича катта тажриба тўпланганида ҳам кўриш мумкин.
Тошкент шаҳрида бошланган бадиий гимнастика бўйича жаҳон кубоги босқичида дунёнинг энг кучли 80 нафарга яқин гимнастикачиси, Happy Caravan халқаро турнирида 40 нафардан зиёд ўсмир қизлар шахсий ва гуруҳ баҳсларида арғамчи, халқа, тўп, булава, тасмада машқ бажариш ҳамда кўпкураш бўйича ўз истеъдод ва маҳоратини намойиш этмоқда.
– Тошкентда ўтаётган нуфузли мусобақаларда қатнашаётганимиздан хурсандмиз, – дейди Ҳиндистон терма жамоаси мураббийи Бабра Жасбир Каур. – Ўзбекистон бадиий гимнастика мактаби ўзининг бой анъаналари ва номдор вакилларига эга.
Мусобақаларда Ўзбекистон шарафини Жамила Раҳматова, Елизавета Назаренкова, Анора Давлатова, Нилуфар Шомуродова ва Жасмин Юсупова сингари гимнастикачилар ҳимоя қилмоқда.
Изоҳ (0)