Ўзбекистоннинг биринчи рақамли теннисчиси Денис Истомин Германиянинг Дюссельдорф шаҳрида давом этаётган турнирнинг ярим финалига чиқди. Бу ҳақда «Olamsport» хабар берди.

Денис турнирнинг чорак финалида мусобақанинг учинчи ракеткаси Андреас Сеппини мағлуб этди.

Сеппи АТП рейтингида 33-ўринни банд этиб турибди. Денис эса 57-поғонадан жой олган. Дастлабки сетда кетма-кет тўртта геймни ютиб олган Истомин якунда 6:3 ҳисобида зафар қучди. Денис иккинчи сет аввалида ҳам рақибининг геймида ғалаба қозонди ва бу устунликни учрашув сўнгига қадар сақлаб қолди – 6:4.

Денис ярим финалда турнирнинг биринчи ракеткаси, германиялик Филипп Колшрайбер ҳамда Мате Делич (Хорватия) учрашуви ғолиби билан тўқнаш келади.

Эслатиб ўтамиз, Дюссельдорф турнирининг мукофот жамғармаси 485 минг 760 еврони ташкил этади. Ғолиб теннисчи 77 минг 315 евро ҳамда 250 рейтинг очкосига ега бўлади. Денис ярим финалга чиққани учун 22 минг 60 евро ҳамда 90 рейтинг очкосига эга бўлиб улгурди.