Ўзбек халқининг буюк адиби Абдулла Қодирий таваллудининг жорий йил 120 йиллиги нишонланмоқда. Тошкент Фотосуратлар уйида ташкил этилган «Абдулла Қодирий Тошкенти» номли бадиий кўргазмадан адиб ҳаёти акс эттирилган болалик, етуклик палласи билан бирга, ёзувчининг қатоғон давридаги қора кунларини ўзида жамлаган суратлар ўрин олган. Бу ҳақда «Туркистон пресс» хабар берди.
— Бугунги кўргазма ўзбекнинг улкан адиби Абдулла Қодирий таваллудига 120 йил тўлиши муносабати билан ташкил этилди, — дейди тадбир иштирокчиси адабиёцҳунос олим, филология фанлари доктори Наим Каримов. — Бундай тадбирлар, анжуманлар шу йилнинг 10 апрелидан буён Қодирийнинг хонадонида, Ўзбекистон Ёзувчилар уюшмасида ва яна кўплаб масканларда уюштириб келинмоқда. Мазкур кўргазмада адибнинг мадрасада ўқиб юрган чоғларидан ноширлик фаолиятигача, асарларини яратиш жараёни, умуман, унинг ХХ аср 40 йилларигача бўлган мазмунли, бироқ фожиали қисмати томошабин кўз ўнгига ҳавола этилди. Рустам Шарипов, Абдуғани Жумаевлардек замонавий ўзбек фотосуратчилари билан бирга Қодирий ҳаёти ва асарларига бағишланган иллюстрациялар, Алишер Мирзаевнинг туркум график расмлари адибнинг халқимизга, айниқса, ёшларга яқинлаштиришга, унинг ижодини ўрганишга кўмаклашиши шубҳасиз.
— Мен бобомнинг мана шундай эътирофга муносиб кўрилаётганлигидан жуда ғурурланаман, — дейди Хондамир Қодирий. — Бундай фотокўргазма биринчи марта ўтказилаётган бўлиб, шу мавзуда илмий конференциялар ташкил этилмоқда. Яқинда отам Ҳабибулла Қодирийнинг «Сўнмаган чироқлар» ва бобомнинг учта асарини бирлаштирган сайланмаси «Шарқ» нашриёт-матбаа акционерлик компанияси томонидан чоп этилди.
Фотокўргазмада Камолиддин Беҳзод номидаги Миллий рассомчилик ва дизайн институти талабаларининг ёзувчи ҳаётига бағишлаб ишланган тасвирий санъат асарлари ҳам намойиш этилди.
Кўргазма 31 майга қадар давом этади.
Изоҳ (0)