20 май куни Нью-Йоркда Microsoft компанияси Surface Pro учинчи авлод планшет компьютерини тақдим этди. У аввалгиларидаги 10,6 дюйм ўрнига, 12 дюймли экран билан таъминланди.
Microsoft’нинг Surface планшетлари бўйича вице-президенти Панос Панай айтишича, Surface Prо 3’ни ишлаб чиқишда компания ноутбук ва планшет танлови ўртасидаги муаммони ҳал қиладиган, ҳар иккаласининг ўрнини босадиган қурилма яратишни хоҳлаган.
Янги планшет Surface Prо 2’га қараганда каттароқ дисплейга эга бўлган бўлса-да, унинг оғирлиги, аксинча, камайди (Surface Prо 2 – 907 грамм, Prо 3 – 800 грамм). Бундан ташқари, аввалги 10,8 мм ўрнига 9,1 мм қалинликка эга бўлди.
Планшетдаги янгиликлардан яна бири шундаки, «уй» тугмаси горизонтал эмас, вертикал панелда жойлашди. Surface Prо 3 Windows 8.1 Prо платформасида ишлайди, иккита 5 мегапикселли камерага эга. Intel Core тўртинчи авлод процессори, 4 – 8 Гб тезкор, 64 – 512 Гб ички хотирага эга.
Surface Prо 3’нинг минимал нархи АҚШда 799 долларни ташкил этади, бу ўтган йилги Surface Prо 2 минимал нархидан 100 долларга арзондир. Бироқ конфигурацияларга қараб, унинг қиймати 1949 долларгача етиши мумкин. АҚШда планшетларга олдиндан буюртма 21 майдан бошланади.
Изоҳ (0)