Миллий матбуот марказида Ўзбекистон Республикаси Халқ таълими вазирлиги томонидан 2013/2014-ўқув йили якунлари ва истиқболдаги устувор вазифаларга бағишланган матбуот анжумани ўтказилди. Бу ҳақда ЎзА хабар беради.

Маълумотларга кўра, бугунги кунда халқ таълими тизимида 15 729 таълим муассасаси фаолият кўрсатмоқда. Умумий ўрта таълим мактабларида 4 миллион 458 минг нафардан ортиқ ўқувчига 390 минг нафардан зиёд устоз ва мураббий, мактабгача таълим масканларида 581 минг нафардан зиёд кичкинтойга қарийб 52 минг нафар педагог таълим-тарбия бермоқда.

Жорий ўқув йилида 394 таълим маскани ўқув жиҳозлари, 1920 мактаб қўшимча жиҳозлар, 1485 мактаб компьютер техникаси билан таъминланди.

2014 йилда 3024 умумтаълим мактаби ва 48 болалар мусиқа ва санъат мактабини 106,2 миллиард сўмлик мебел, ўқув-лаборатория асбоб-ускуналари, компьютер техникаси, спорт анжомлари ва мусиқа асбоблари билан таъминлаш кўзда тутилган. Умумтаълим мактабларининг бошланғич синфлари чет тили кабинетларини 4193 тўплам техник воситалар ҳамда юқори синф чет тили хоналарини 1500 тўплам компьютер техникаси билан таъминлаш режалаштирилган. Айни пайтда билим масканларидаги чет тиллари хоналари учун техник воситалар, ўқув адабиётлари, луғатлар, расмлар тўплами, компьютер техникасини етказиб беришга алоҳида эътибор қаратилмоқда.

2013/2014-ўқув йилида 392 номдаги 22,5 миллион нусха дарслик ва ўқув-методик қўлланмалар чоп этилиб, жойларга етказилди. Умумий ўрта, ўрта махсус, касб-ҳунар таълими муассасаларида ўқитиладиган 18 умумтаълим фани бўйича 38 умумий ўрта, 28 ўрта махсус, касб-ҳунар таълими масканларида компетенсиявий ёндашувга асосланган давлат таълим стандартлари ва ўқув дастурлари лойиҳаларининг тажриба-синов жараёни амалга оширилмоқда.