General Motors Uzbekistan компаниясининг расмий сайти — chevrolet.uz ишламай қолди. Бунга сабаб — хостинг хизматлари учун пул тўланмаганлигида, деб жавоб берди Arsenal-D компанияси техник хизмати ходими.

21 май 17:05 ҳолатига кўра chevrolet.uz сайтининг бош саҳифасида қуйидаги ёзув бор:

Сайт хостинг тақдим қилиш муддати тугагани ёки диск ҳажмининг ошиб кетганлиги сабабли блокланди. Илтимос, қуйида кўрсатилган контакт билан хостинг провайдерига мурожаат қилинг.

Таъкидлаш жоиз, chevrolet.uz домени GM Uzbekistan қўшма корхонасига эмас, балки номаълум жисмоний шахсга тегишлидир. Бу ҳақда Uz домени маъмурияти расмий сайти — cctld.uz'да маълумот берилган.

Google қидирув тизими натижаларида chevrolet.uz GM Uzbekistan ЁАЖ расмий сайти сифатида келтирилган.

GM Uzbekistan'га тегишли 141-77-77 телефон рақамида маълумот беришларича, chevrolet.uz чиндан ҳам GM Uzbekistan компанияси расмий сайтидир.