Тошкентдаги «Туркистон» саройининг ёзги майдонида «Ёшлик баҳори» республика ёш опера ижрочилари ва симфоник мусиқа фестивалининг гала-концерти бўлиб ўтди, деб хабар бермоқда ЎзА.
2014 йилдан «Ёшлик баҳори» республика ёш опера ижрочилари ва симфоник мусиқа фестивали кенг кўламли мусиқий-маданий тадбирлар қаторидан жой олди. «Соғлом бола йили» Давлат дастурига мувофиқ ўтказилган ушбу фестивал Ўзбекистон Республикаси Маданият ва спорт ишлари вазирлиги ва «Камолот» ёшлар ижтимоий ҳаракати томонидан ташкил этилди.
Фестивалнинг жорий йил март—апрель ойларида ўтказилган саралаш босқичларида 50 дан зиёд хор гуруҳлари ва яккахон опера ижрочилари иштирок этди. Улардан йигирма нафардан ортиғи якуний гала-концертда қатнашиш ҳуқуқини қўлга киритди. Бундан ташқари, 90 нафар истеъдодли ёш мусиқачи саралаб олиниб, Ўзбекистон Ёшлар симфоник оркестри таркибига киритилди. Айнан ушбу ёш истеъдод соҳиблари фестивалнинг биринчи гала-концертини муваффақият билан ўтказиб, миллий ва жаҳон опера санъатининг энг яхши асарларини томошабинлар эътиборига ҳавола қилди.
– Опера асарлари яратган бастакорларнинг машаққатли меҳнати таҳсинга лойиқдир, – дейди Ўзбекистон халқ артисти Исмоил Жалилов. – Шу билан бирга, асарни ижро этадиган санъаткордан ҳам катта маҳорат талаб этилади. Асар маҳорат билан ижро этилсагина унинг асосий ғоясини тингловчи қалбига етказиш мумкин. Гала-концерт мамлакатимизда иқтидорли ёшлар кўплигини, опера санъати эса жадал ривожланиб бораётганини яққол кўрсатди.
Иштирокчилар нафақат миллий, балки халқаро танлов ва мукофотлар ғолиб ҳамда совриндорлари экани тадбирнинг нуфузини янада оширди. Улар орасида Ўзбекистон Республикасида хизмат кўрсатган артистлар, Алишер Навоий номидаги Ўзбекистон Давлат академик катта театри яккахон ижрочилари Рамиз Усмонов ва Самандар Алиев ҳам бор. Ёш ижрочиларнинг миллий ва халқаро опера санъати анъаналарини бойитиш ҳамда муносиб давом эттиришга қўшган ҳиссаси нафақат Ўзбекистон, балки хорижий давлатларда ҳам эътироф этилган. 2011 йилда Cомпетизионе деллъОпера халқаро хонандалар танловида 150 нафардан зиёд иштирокчи орасида биринчи ўринни эгаллаган Раҳим Мирзакамолов, «Ниҳол» мукофоти совриндори, 2013 йилда ўтказилган «Романсиада» халқаро хонандалар танлови ғолиби Умид Исроиловнинг ижроси опера ихлосмандларида катта таассурот қолдирди.
Фестивалнинг кичик ёшли иштирокчилари ҳам томошабинлар олқишига сазовор бўлди. Масалан, италиялик композитор Д. Каччинининг «Аве Мария» композициясини ижро этган В. Успенский номидаги республика ихтисослаштирилган мусиқа академик лицейи хор жамоасининг чиқиши барчага манзур бўлди.
Фестивалда Ўзбекистон Ёшлар симфоник оркестрининг турли мусиқий асбобларда турли даврларда ёзилган мумтоз ҳамда замонавий мусиқа асарларини маҳорат билан ижро этиши ҳам томошабинларда катта таассурот қолдирди.
Изоҳ (0)