Twitter ва Facebook’нинг ёпилиши ҳақидаги баёнотини рад этган бўлса-да, Россия назорат қўмитаси раҳбари Максим Ксензовга «лавозим мажбуриятларини тегишли равишда бажармагани учун» ҳайфсан эълон қилинди. Бу ҳақда «ИТАР-ТАСС» хабар берди.
Ксензовга нисбатан хизмат текшируви ўтказиш бўйича комиссия хулосаси асосида алоқа ва оммавий коммуникация вазири Николай Никифоров «маъмурий жазо қўллаш ҳақида» қарор қабул қилди.
Аввалроқ Россия назорат қўмитаси (Алоқа, ахборот технологиялари ва оммавий коммуникация соҳасида назорат бўйича федерал хизмат) раҳбари ўринбосари Максим Ксензов мамлакатда Twitter ва Facebook’ни ёпиб қўйишлари мумкинлиги ҳақида баёнот берган эди. «Ижтимоий тармоқларни блоклаб қўйишда ҳеч қандай рискни кўрмаяпман», — деган эди у.
Медведев эса унга жавобан, ижтимоий тармоқларнинг фаол фойдаланувчиси сифатида Россия қонунчилигига тармоқлар ҳам, фойдаланувчилар ҳам риоя қилиши керак, деб ҳисоблашини билдирди. «Бироқ соҳа тараққиётига жавобгар бўлган баъзи мансабдор шахслар вақти-вақти билан калласини ишлатиши ва ижтимоий тармоқлар ёпилиши ҳақида эълон қилувчи интервьюларни бермаслиги керак», — деб ёзди у.
Изоҳ (0)