Самарқанд шаҳрида теннис бўйича ATP-Challenger туркумига кирувчи, соврин жамғармаси 50 минг АҚШ долларидан иборат турнир ўзбекистонлик ракетка устасининг ғалабаси билан якунланди, деб хабар бермоқда «Olamsport».
Ўзбекистоннинг иккинчи рақамли теннисчиси Фаррух Дўстов ҳал қилувчи финал учрашувида россиялик Аслан Карацевни мағлубиятга учратди. Учрашув 1 соату 29 дақиқа давом этди.
Фаррух Дўстов халқаро турнир ғолиби бўлиш билан бирга 7200 АҚШ доллари миқдоридаги мукофотга ҳам сазовор бўлди. Мазкур ғалаба 22 май куни 28 ёшни қаршилайдиган Дўстов учун ажойиб совға бўлди, деб ёзади «Olamsport».
Таъкидлаш жоиз, бу Дўстов фаолиятидаги Чалленгер туркумида қўлга киритилган учинчи титул бўлди.
Эслатиб ўтамиз, ушбу турнирда Ўзбекистоннинг биринчи рақамли теннисчиси Денис Истомин ҳам иштирок этган эди. Афсуски, дунё рейтингида кучли 60 таликда бораётган Истомин иккинчи даврада голландиялик Бой Вестерхоффга имкониятни бой бериб, мусобақани тарк этди.
Изоҳ (0)