2014 йилнинг 20—25 май кунлари Тошкент шаҳрида бадиий гимнастика бўйича Жаҳон кубоги босқичи ва Happy Caravan халқаро турнири ўтказилади. Бу ҳақда Ўзбекистон Миллий Олимпия қўмитаси матбуот хизмати хабар берди.
Халқаро Гимнастика федерацияси ҳомийлигида ўтказиладиган Жаҳон кубоги баҳсларида Ўзбекистон, Хитой, Жанубий Корея, АҚШ, Чехия, ЖАР, Малайзия, Мексика, Россия, Озарбайжон, Арманистон, Беларусь, Вьетнам, Исроил, Ҳиндистон, Италия, Қозоғистон, Қирғизистон, Латвия ва Япониядан келган жами 79 нафар спортчи ғолиблик учун кураш олиб боради.
Жаҳон кубоги босқичида Ўзбекистон терма жамоаси жамоавий машқларда, Жамила Рахматова ва Елизавета Назаренкова эса шахсий ҳисобда Ватанимиз шарафини ҳимоя қилади. Шунингдек, яна тўрт нафар гимнастикачи конкурсдан ташқари мусобақада иштирок этади.
Ўз навбатида ҳар йили анъанавий тарзда ўтказиладиган Happy Caravan халқаро турнирида Ўзбекистон, Хитой, АҚШ, Россия, Чехия, Латвия, Озарбайжон ва Қозоғистон давлатидан келган 40 нафардан зиёд спортчи ғолиблик учун кураш олиб боради.
Мазкур мусобақанинг жамоавий машқларида Ўзбекистон ёшлар терма жамоаси аъзолари иштирок эца, шахсий ҳисобда Анора Давлатова, Нилуфар Шомуродова ва Жасмин Юсупова Ўзбекистон шарафини ҳимоя қилади.