Японияда ҳозирги батареялардан 20 марта тез зарядланадиган аккумулятор ишлаб чиқилди

Япониянинг Power Japan Plus компанияси Кюсю университети мутахассислари билан ҳамкорликда углеродли ёқилғи элементида ишлайдиган батареяни ишлаб чиқишди. Бу ҳақда «ИТАР-ТАСС» хабар берди.

Ишлаб чиқувчиларнинг таъкидлашича, Ryden деб ном олган батарея 100% қайта ишланадиган материаллардан ташкил топган. Шу билан бирга, у ҳозирги вақтда электрон қурилмаларда кенг ишлатиладиган литий-ионли батареяларга қараганда 20 марта тезроқ зарядланади.

Power Japan Plus’дагилар Ryden батареясининг литий-ионлидан кўра арзонроққа тушишини айтишди, бироқ нархини аниқ келтиришмади.

Ишлаб чиқувчилар янги батареяни сотувга чиқариш масаласини кўриб чиқмоқда. Маҳсулот учун нодир металлар талаб қилинмайди, шу сабабли улар Япония ҳукуматининг ўзи янгиликни қўллаб-қувватлашига умид қилмоқда.

Камёб металлар Японияга асосан Хитойдан келтирилади. Янги техника Токионинг Пекинга боғлиқлигини камайтиради. Бу эса Сенкаку ороли бўйича Хитой билан келишмай қолиб, муносабатлари бузилган Японияга қўл келади.