Тошкентда «Чарм, поябзал, кийим ва аксессуарлар» халқаро кўргазмаси очилди
Пойтахтдаги «Ўзкўргазмасавдо» мажмуасида «Чарм, поябзал, кийим ва аксессуарлар» ИВхалқаро кўргазмаси очилди. Кўргазма Ўзбекистон Республикаси Савдо-саноат палатаси кўмагида «Ўзбекчармпоябзали» уюшмаси, «Ўзбекенгилсаноат» давлат акциядорлик компанияси ва Expocontact масъулияти чекланган жамияти томонидан ташкил этилди. Бу ҳақда ЎзА хабар берди.
Тўртинчи марта ўтказилаётган «Чарм, поябзал, кийим ва аксессуарлар» халқаро кўргазмасида Хитой, Италия, Россия, Индонезия, Туркия ва бошқа давлатлардан 80 дан ортиқ корхона қатнашмоқда. Улар мода саноатининг энг сўнгги йўналишлари ва бозор талабларини инобатга олган ҳолда, поябзал ва тикувчилик маҳсулотлари, чарм, газлама, мўйна ва қоракўлдан аксессуарларни намойиш этмоқда. Шунингдек, иштирокчилар стендларида замонавий асбоб-ускуналар, технологиялар ва фурнитураларни ҳам кўриш мумкин.
«Ўзбекчармпоябзали» уюшмаси таркибига кирадиган корхоналар кенг экспозицияни иштирокчилар эътиборига ҳавола қилмоқда. Масалан, «Фарғона чарм полимер», «Поябзалчи», Style-Step, Edelweys, «Дамбоғ поябзали савдо» компаниялари аёллар, эркаклар, болалар, спорт поябзали, шунингдек, махсус оёқ кийимлар, ортопедик ва бошқа кенг турдаги поябзал маҳсулотларини намойиш этмоқда.
– Корхонамиз чарм ва унинг ўрнини босадиган материаллар, резинадан поябзаллар ишлаб чиқармоқда, – дейди Самарқанд вилоятидаги «Замон Текстил Экспорт» масъулияти чекланган жамиятининг лойиҳалар бўйича менежери Шерали Темиров. – Маҳсулотларнинг катта қисми МДҲ мамлакатларига экспорт қилинмоқда. Қозоғистонда ҳам ўз корхонамизни очиб, Россияда дўконлар тармоғини ташкил этдик. Чет эллик ҳамкорларимиздан кўплаб буюртмалар келиб тушмоқда. Шунинг учун ишлаб чиқариш қувватини ошириб, тўқимачилик маҳсулотлари тайёрлашни йўлга қўймоқдамиз.
Италиянинг Siretessile Textile Industry компанияси менежери Марко Нерининг таъкидлашича, Ўзбекистоннинг поябзал ишлаб чиқариш салоҳияти ортиб бораётир ва бу ўзаро манфаатли халқаро ҳамкорликни йўлга қўйишни тақозо этади. Пойтахтдаги «Про-Обув» масъулияти чекланган жамияти кенг турдаги тайёр махсус поябзалларни тақдим этмоқда. Кўргазманинг биринчи кунида корхона маҳсулотларининг хорижий харидорлари сафига Жанубий Корея компаниялари ҳам қўшилди.
– Аввал ўтказилган кўргазмалар юртимизда ишлаб чиқарилган товарлар юқори сифати ва замонавий дизайни билан ажралиб туриши, хорижий маҳсулотлардан бир неча баробар арзон эканини намойиш этди, – дейди «Ўзбекчармпоябзали» уюшмаси бошқаруви раисининг ўринбосари Шарифжон Шералиев. – Бу ички бозорни харидоргир миллий маҳсулотлар билан тўлдириш баробарида уларнинг жаҳон бозорида рақобатбардошлигини оширишга ёрдам бермоқда.
Кўргазма дастури доирасида ҳунармандлик, оилавий тадбиркорлик ва касаначиликни ташкил этиш ҳамда ривожлантиришга оид тренинг, аёллар либосаларини тайёрлаш бўйича маҳорат сабоқлари ва бошқа тадбирлар ўтказилади.
