Beeline «Мўъжизалар даври» хайрия кўргазмасига ҳомийлик қилади

Beeline алоқа оператори 17 май куни Lotte City Hotel Tashkent Palace меҳмонхонасида бўлиб ўтадиган «Мўъжизалар даври» XIII хайрия кўргазмасининг ҳомийси бўлади. Бу ҳақда компания матбуот хизмати хабар берди.

Хайрия кўргазмасида 1000 дан ортиқ буюмлар — суратлар, очиқ хатлар, юмшоқ ўйинчоқлар, зардўзлик буюмлари, нозмунчоқдан тайёрланган ва тикувчилик маҳсулотлари, аппликациялар, турли хил безак буюмлари тақдим этилади.

«‘Мўъжизалар даври’ каби тадбирда қатнашиш нафақат ёқимли, балки фахрлидир. Биз барча абонентларимизни ушбу кўргазмага таклиф қиламиз, — дейди компаниянинг матбуот котиби Юлия Мелентьева. — Бу биз учун яхши анъана ва ‘Хайрли ишлар’ лойиҳасининг давоми бўлади».

Тадбир «Умидворлик» имконияти чекланган болалар ва уларнинг оилаларини қўллаб-қувватлаш маркази ва Ўзбекситон—Япония инсон манбаларини ривожлантириш марказининг (UJC) PMP Битирувчилар Клуби (А-Club) номидан ташкил этилади.

Хайрия кўргазмасида йиғилган барча маблағлар иштирокчи-ташкилотларга болаларнинг ижодиётини янада ривожлантириш ишлари учун йўналтирилади.